රු 10,000 බැගින් ලබාගෙන ලබාදුන් ශිෂ්‍ය නායක පදක්කම බින්දුවටම බැස්සවූ රහස

2024 වසරේදී එක් සිසුවකගෙන් රුපියල් 10,000ක මුදලක් අයකර ශිෂ්‍ය නායක ලාංඡන පැළඳවීමේ උත්සවය පවත්වා ඊට වසරකට පසු මෙවර 2025 දී ශිෂ්‍ය නායකයන් පත් කිරීමේදී කිසිම මුදලක් අය නොකරම එම උත්සවය පැවැත්වීමේ රහස කුමක්දැයි ඔබ දන්නවාද

රාජකීය විද්‍යාලය යනු කෝටිපතියන්ගේ සිට සොච්චම් පඩියට වැඩ කරන දෙමව්පියන් මෙන්ම හරි හමන් රස්සාවක්වත් නොමැති අයගේ දරුවන්ද සිටින පාසලකි

මිල මුදල් යහමින් ඇති එකිනෙකාට පන්දම් අල්ලා, දක්ෂයන් හා සුදුස්සන් සිටියදී තමුන්ගේ දරුවන්ව හැමදේකින්ම ඉදිරියටම ගෙනයන චෞර දෙමාපියන් කිහිප දෙනෙකු විසින් නොයෙකුත් දේ පවසමින් මෙතෙක් කල් කෝටි ගණන් එකතු කළ මුදල් වල ලොකු වෙනසක් මේ ළඟකදී සිට සිදුවූ බව බොහෝ දෙනකුට දක්නට ලැබුණි

මෙම වෙනසට බලපෑ හේතු වලින් එක් ප්‍රධාන හේතුවක් පහතින් දක්වා ඇත

සුදුස්සාට සුදුසු තැන ලැබෙන, මුදල් හා අනෙකුත් ලාභ ප්‍රයෝජනවලට යථාර්ථය පවා නොදෙන නියම රාජකීය විද්‍යාලයක් වෙනුවෙන් අපගේ උපරිමය කරන බවට මෙයින් සහතික වෙමු -------------------------------------------------------------------------------------------------------------------- අල්ලස් හෝ දුෂණ චෝදනා විමර්ශන කොමිෂන් සභාව වෙත අප යොමුකළ පැමිණිල්ල

පද්මසේන දිසානායක,

ආදි ශිෂ්‍ය- කොළඹ රාජකීය විද්‍යාලය,

අංක 57/14, රජමහ විහාර මාවත,

‍පිටකෝට්ටේ.

 2024/12/10

 

අධ්‍යක්ෂතුමා,

අල්ලස් හෝ දූෂණ චෝදනා විමර්ශන කොමිෂන් සභාව,

අංක 36,මලලසේකර මාවත,

කොළඹ 07,

ගරු අධ්‍යක්ෂතුමනි,

කොළඹ රාජකීය විද්‍ය‍ාලය තුළ අනීතිකව සිදුකරනු ලබන මුදල් එකතුකිරීම් හා වංචා දූෂණ සම්බන්ධව වන පැමිණිල්ල

අධ්‍යාපන අමාත්‍යංශය විසින් 2015 අංක 5 දරණ චක්‍රලේඛනය යටතේ පාසල් සිසුන්ගෙන් හෝ දෙමාපියන්ගෙන් මුදල් අයකිරීම  සපුරා තහනම් කර ඇති පසුබිමක මෙකී නියෝග  ඔබ හොඳින් දන්නා පරිදි රජයේ පාසල් තුළ මුදල් එකතුකිරීම , තෑගි දීම හෝ වෙනත් තුටු පඬුරු ලබාදීම මෙරට නීතිය අනුව වරදක් වන නමුත් තවමත් කොළඹ රාජකීය විද්‍යාලය තුළ එකී නීති පසක තබා විදුහල්පතිවරු, නියෝජ්‍ය විදුහල්පතිවරු , අංශ ප්‍රධානීන් ඇතුළු සෙසු ගුරු මණ්ඩලයේ ද අනුදැනුම සහිතව සිසුන්ගෙන් සහ දෙමාපියන්ගෙන්  අසාධාරණ ලෙස මුදල් එකතු කිරීම සිදුවන බව ඔබ තුමාගේ අවධානයට යොමුකිරීමට කැමැත්තෙමි.

 කොළඹ රාජකීය විද්‍යාලයේ නව රගහලේ  2024.07.15 වන දින පවත්වන ලද  කණිෂ්ඨ ශිෂ්‍ය නායකන්ගේ නිළ ලාංජන පැළදවීමේ උත්සවය සදහා තේරී පත් වූ ශිෂ්‍ය නායකයන් 93දෙනාගෙන් එම උත්සවය සදහා රුපියල් දසදහසක (10,000.00)  මුදලක් එකතු කර ඇති  අතර එහි මුළු එකතුව රුපියල් 930,000.00  වන අතර ඒ පිළිබඳව මා විසින් නියෝජ්‍ය විදුහල්පතිගෙන් 2024.07.05 වන දින ඊමේල් පණිවිඩයක් හරහා විමසන ලද අතර එම ඊ මේල් පණිවිඩයට  පිළිතුරු නොලැබුණු  අතර පසුව නියෝජ්‍ය විදුහල්පති පී.ඒ.ඩී.පී. නිශාන්ත මහතා විසින් වට්ස්ඇප් පණිවිඩයක් යොමුකරමින් දැනුම් දුන් පරිදි දෙමාපිය රැස්වීමේ දී   2024 ජූලි 12 වන දින පෙ.ව.8.00 ට කොළඹ රාජකීය විද්‍යාලයේ RCU කාමර අංක 301 දී පැවැත්වූ දෙමාපිය රැස්වීමේදී එකඟ වූ පරිදි ශිෂ්‍ය නායකයන්ගෙන් එම උත්සවය සඳහා එකතු කරන ලද රුපියල් දසදහසක (10,000.00) මුදලින් රුපියල් හාරදහසක (4000.00) මුදලක් පමණක් ඉහත සඳහන් කරන ලද ශිෂ්‍ය නායක උත්සවය සඳහා වෙන්කරන බවත් ඉතිරි රුපියල් හය දහසක (6000.00) මුදල ඉදිරි ව්‍යාපෘති සඳහා වෙන්කරන ලද බවත් ය.

ඉහත සදහන් කරන ලද මුදල එකතු කිරීම සම්බන්ධව කිසිදු ලිඛිත උපදෙසක් දෙමාපියන් වෙත නොලැබුණු අතර  මෙම මුදල් එකතු කිරීම සම්බන්ධයෙන් නියෝජ්‍ය විදුහල්පතිගේ අනුදැනීම මත දෙමාපියන් දෙදෙනකු නියෝජිතයන් වශයෙන් පත් කරන ලද අතර එම මුදල් එකතු කිරම සම්බන්ධව පාසල් සංවර්ධන සමිතිය විසින් නිකුත් කරන ලද කිසිදු රිසිට් පතක් මේ වන තෙක් කිසිදු දෙමාපියෙකුට ලැබී නොමැත .

විශේෂයන් මෙහි දී සඳහන් කළ යුතු කරුණු වනුයේ  නියෝජ්‍ය විදුහල්පතිගේ අනුදැනීම මත ඔවුන් විසින්ම තෝරාපත්කර ගන්නා ලද දෙමාපියන් පිරිසක් (දෙමාපිය නියෝජිතවරුන්) හරහා මෙකී මුදල් එක් රැස් කිරීම සිදුකරනු ලබන නමුත් එකී මුදල් සම්බන්ධව සියලු තීරණ ගැනීම ‍බලධාරීන්  විසින් සිදුකරනු ලබයි. එමෙන්ම ‍එකී මුදල් සඳහා භාණ්ඩාගාරිකවරුන් වශයෙන් ද එකී දෙමාපියන් කටයුතු කරනු ලබන බවයි.

මෙකී දූෂණ හා අල්ලස් ගැනීම් සම්බන්ධ නීතියේ රැහැනට හසු නොවීම සඳහා එකී ගුරුවරුන් හා සෙසු බලධාරීන් විසින් සිදුකරනු ලබන ක්‍රියාවලිය වනුයේ දෙමාපියකු ගේ පුද්ගලික ගිණුමට මුදල් බැරකර පසුව ඉන් යම් කොමිස් මුදලක් තමන් වෙත ලබාගැනීම වේ.පහත සඳහන් පුදගලයාගේ ගිණුම් අංකය වෙත බැර කරන ලෙස එක දෙමාපියෙකු විසින් ඉල්ලා ඇත. වඩාත් පැහැදිලි වීම උදෙසා අදාළ ගිණුම් විස්තර ඉංග්‍රීසි බසින් ඇතුළත් කර තිබෙන බව කාරුණිකව සළකන්න.ඇමුණුම [1]

එමෙන්ම ඉහත සදහන් කරන ලද ඉතිරි රුපියල් හය දහස යෙදවීමට යෝජනා කරන ලද ඉදිරි ව්‍යාපෘතිය කුමක්ද යන්න දෙමාපියන් ව හෝ දරුවන්ව  දැනුවත් කිරීමකින් තොරව “කනිෂ්ඨ ශිෂ්‍ය නායකන්ගේ දෙමාපිය සංගමය ’’ ලෙස සංවිධානය වූ පිරිසකගේ එක අයෙකු විසින් whatsapp සමුහය වෙත පනිවිඩයක් යොමුකරමින් සදහන්  කරන ලද්දේ කනිෂ්ට ශිෂ්‍ය නායකන්ගේ ව්‍යාපෘතියට අදාලව ලැප්ටොප් පරිගණක දෙකක් සහ මුද්‍රණ යන්ත්‍රයක් පාසලේ පරිගණක විද්‍යාගාරයට පරිත්‍යාග කල බවත්ය

නමුත් පවතින නෛතික රාමුවට අදාලව පාසල වෙත පරිත්‍යාග සිදු කල යුත්තේ පාසල් සංවර්ධන සමිතිය හරහා බවත් වන අතර  මෙලස පාසලට අවශ්‍ය තාක්ෂණික උපකරණ මිලදී ගැනීමට අවශ්‍යතාවයක් පවහි නම් විනිවිදභාවයකින් යුතු ප්‍රසම්පාදන ක්‍රිියාවලියක් අනුගමනය කල යුතු බවත් එලෙස කිසිදු නෛතික පටිපාටියක් අනුගමනය නොකර මෙලෙස දෙමාපියන්ගේ මුදල් අවභාවිතා කිරීමට රාජකීය විදුහලේ අදාළ බලධාරීන් කටයුතු කරන බව ඉහත සාක්ෂි වලින් පෙනී යයි  

මේ සම්බන්ධව අදාළ ලේඛණ ‘ඇමුණුම 2” වෙත යොමුවන ලෙස ඉල්ලා සිටිමි. මෙකී තොරතුරු පුද්ගලික තැනැත්තකු හට ලබාගැනීම ඉතා අපහසු වූ නමුත් දූෂණ විරෝධී පනතේ 42(1) අ උප වගන්තිය යටතේ යම් තොරතුරක් ලැබීමෙන් පසුව මූලික පරීක්ෂණ හා විමර්ශණ කිරීම සඳහා වන බලතල අනුව මේ පිළිබඳව තවදුරටත් විමර්ශනය කරනු ලබනු ඇතැයි යන්න අපගේ දැඩි විශ්වාසයයි.

ඉහත කරුණු අනුව පෙනී යනුයේ ගුරුවරුන් හා සෙසු බලධාරීන් දෙමාපියන් ද සමග එක්ව අධ්‍යාපන චක්‍රලේඛ බැහැර කරමින් වක්‍රාකාරයෙන් නීතිවිරෝදීව මුදල් එක්රැස් කරන බවයි . එබැවින් ඔබ කොමිෂන් සභාව සතු බලතල භාවිත කරමින් මෙවන් අකටයුතුකම් මෙම කොළඹ රාජකීය විද්‍යාලය තුළ නොවන ලෙසට සුදුසු නීතිමය පියවර ගන්නා ලෙස ඔබතුමන්ගෙන් කාරුණිකව ඉල්ලා සිටිමු.

 

‍මෙයට විශ්වාසී,

  

පද්මසේන දිසානායක

   

---

[1] මෙකී මුදල් ගනුදෙනුවට සම්බන්ධ ගිණුම්  තොරතුරු ඇමුණුම් අංක 01 යටතේ දක්වා ඇත.

 [2] මෙකී  මුදල් එකතුකිරීම සම්බන්ධව මා වෙත ලැබී තිබෙන ලේඛණ සෙසු සාක්ෂි ඇමුණුම් අංක 02 වශයෙන් අමුණා ඇත.